Niðurstöður PISA 2009 rannsóknarinnar.

Niðurstöður OECD-PISA 2009 rannsóknarinnar á lesskilningi og læsi á stærðfræði og náttúrufræði á meðal 15 ára nemenda, eru nú tilbúnar. Ísland tók þátt í rannsókninni í fjórða sinn árið 2009, ásamt 68 öðrum löndum innan og utan OECD. Áhersla rannsóknarinnar í þetta sinn var á lesskilning, á lestur hefðbundinna texta og rafrænna. Niðurstöður um lesskilning á rafrænum textum verða birtar í júní 2011.

Undanfarinn áratug hefur lesskilningi íslenskra nemenda hrakað í hvert sinn sem mælingin hefur verið gerð, þ.e. árin 2000, 2003 og 2006. Nú hefur þróunin hins vegar snúist við og hafa íslenskir nemendur endurheimt sína fyrri stöðu. Einungis 10 af 68 löndum sem tóku þátt í rannsókninni sýna betri frammistöðu en Ísland og einungis 8 af 33 OECD löndum. Þessi breyting er ákaflega mikilvæg og bendir til þess að grunnskólakerfið standi sig afar vel. Frammistaðan í stærðfræði og í náttúrufræði hefur hins vegar ekki breyst marktækt frá fyrri rannsóknum og er þörf á átaki í þeim greinum, sérstaklega í náttúrufræði þar sem frammistaða Íslands er talsvert undir meðaltali OECD landanna.

• Einungis 10 lönd af 68 eru með marktækt betri frammistöðu en Ísland í lesskilningi í PISA 2009 og einungis 8 OECD lönd af 33 hafa marktækt betri lesskilning.
  
• Frammistaðan í stærðfræði og náttúrufræði stendur í stað frá fyrri rannsóknum. Ísland er í 11.-13. sæti í stærðfræði miðað við öll OECD löndin 33 en í 20.-25. sæti í náttúrufræði.
  
• Kynjamunur í stærðfræði og náttúrufræði reyndist ekki vera til staðar á Íslandi lengur á meðal 15 ára nemenda. Í lesskilningi standa stúlkur ennþá drengjum verulega framar, á svipaðan hátt og í nágrannalöndunum.
  
• Breytileiki á milli skóla á Íslandi hefur aukist verulega á síðustu árum og Ísland er ekki lengur á meðal þeirra landa sem hafa allra minnstan mun á milli skóla, eins og áður var.
  
• Dregið hefur saman með Norðurlandaþjóðunum fjórum, Íslandi, Noregi, Svíþjóð og Danmörku í öllum greinum. Framfarir hafa orðið frá 2006 hjá bæði Noregi og Íslandi, sérstaklega í lesskilningi, Danmörk hefur staðið í stað og frammistöðu Svíþjóðar hefur hrakað. Finnland sýnir enn frammistöðu sem er með því besta sem sést i allri rannsókninni.
  
• Lesskilningi á meðal 15 ára nemenda á Íslandi hrakaði jafnt og þétt á tímabilinu frá 2000 til 2006, en nú hefur þróunin snúist við og íslenskir nemendur hafa náð fyrri stöðu sinni aftur.
  
• Talsverður munur er á frammistöðu á Íslandi eftir landshlutum í öllum greinum.

Íslenska skýrslu um niðurstöður PISA 2009 má nálgast á heimasíðu Námsmatsstofnunar (www.namsmat.is), ásamt skýrslum OECD um PISA 2009. Áfram verður unnið að greiningu á niðurstöðum og þær síðar kynntar frekar í skólum og fræðsluumdæmum og á reglulegum fræðslufundum á stofnuninni.

Efni um PISA 2009

Íslenskar niðurstöður

Fréttatilkynning frá OECD

Samantekt helstu niðurstaðna frá OECD

PISA 2009 Results: What Students Know and Can Do. (Volume I)

PISA 2009 Results: Overcoming Social Background. (Volume II)

PISA 2009 Results: Learning to Learn. (Volume III)

PISA 2009 Results: What Mages a School Successful? (Volume IV)

PISA 2009 Results: Learning Trends. (Volume V)

Áætlun fyrir kynningarvinnu á næsta ári er eftirfarandi.

Janúar 2011 - Mynd af skólum
Þeir grunnskólar sem tóku þátt í PISA með 15 eða fleiri nemendur fá upplýsingar um stöðu skólans í lesskilningi, stærðfræði og náttúrufræði. Þar eru meðaltöl og dreifing innan skólans.

Janúar til maí 2011 - Fræðsluskrifstofur
Fræðsluskrifstofur eiga kost á að fá kynningar um skóla á svæðinu. Greint er frá niðurstöðum um færnisvið lesskilnings, flokka lesskilningsverkefna, hæfnisþrep, þróun yfir tíma og kynjamun. Samanburður við niðurstöður sömu nemenda á samræmdum prófum 10. bekkjar í íslensku og stærðfræði. Hægt er að óska eftir frekari greiningu á niðurstöðum PISA.

Janúar til maí 2011 - Umræðufundir
Mánaðarlegir umræðufundir um niðurstöður PISA 2009. Kynnt nánari úrvinnsla á niðurstöðum fyrir Ísland í alþjóðlegu samhengi. Afmörkuð málefni tekin fyrir líkt og á fyrri umræðufundum um PISA 2006.

PISA 2009

Árið 2009 er aðallega lesskilningur metinn í PISA. Einnig er metin færni í stærðfræði og náttúrufræði til að skoða þróun hennar yfir tíma. Ný verkefni hafa verið samin fyrir lesskilningshlutann en þau verkefni eru flokkuð á sama hátt og verkefnin árið 2000 þegar lesskilningur var síðast aðal viðfangsefnið. Í PISA 2009 verður mögulegt að skoða þróun ólíkra færnisviða lesskilnings frá 2000 á áreiðanlegan hátt.

Fyrirlögn í íslenskum skólum er í mars og apríl 2009. Allir nemendur í 10. bekk sem geta svarað 2 klst skólaprófi og svarað 30 mínútna spurningalista eru beðnir að taka þátt. Einnig nemendur fæddir 1993 sem stunda nám í framhaldsskólum.

Auk hins hefðbundna prófs á pappír tekur Ísland þátt í mati á lesskilningi nemenda á rafrænum texta. Það verkefni kallast ERA (Electric Reading Assessment) og þar eru lesskilningsverkefni lögð fyrir á tölvu. Verkefnin er þannig úr garði gerð að nemendur þurfa að vinna með texta í vefsíðuumhverfi til að svara spurningum. Hér er metin skilningur, túlkun, endurheimt og íhugun nemenda á textanum og færni nemenda bæði í að afla upplýsinga úr rafrænum texta. Tölvuprófið tekur 1 klst í fyrirlögn og handahófsúrtak nemenda er valið til þátttöku í því.

Tvær mikilvægar breytingar verða á framkvæmdinni í ár frá fyrri árum. Sú fyrri er sú að ekki verður prófað í öllum skólum samdægurs, heldur mun prófunin dreifast á þrjár vikur, tímabilið 16. mars - 3. apríl 2009 og er hverjum skóla úthlutað ákveðinni dagsetningu.
Með seinni breytingunni er reynt að koma til móts við þátttökuskóla með því að draga verulega úr vinnuframlagi þeirra í rannsókninni. Í þetta sinn kemur prófandi frá Námsmatsstofnun í skólann á prófdag og sér um framkvæmdina bæði á pappírs- og tölvuprófi. Við fyrirlögnina starfa 14 prófendur hjá Námsmatsstofnun á prófunatímabilinu.

Líkt og áður fer prófun þannig fram að allir þátttakendur í skólanum taka prófið sama dag og tekur pappírsprófið sjálft tvær klukkustundir, spurningalisti hálfa klukkustund og með leiðbeiningum og hléum stendur fyrirlögn yfir í u.þ.b. þrjár klukkustundir. Tölvuprófið er lagt fyrir seinnipart prófdags og tekur um klukkustund í framkvæmd en gert er ráð fyrir að nemendurnir í úrtakinu séu prófaðir allir í einu.

Tímarammi PISA 2009:

Markmið fyrir PISA 2009
Des 2008: Prófdagsetningar skóla ákveðnar.
Jan-feb 2009: Prentun á prófheftum, kynning á prófinu í skólum og þjálfun prófenda.
Mars-apríl 2009: Fyrirlagnir í öllum þátttökuskólum.
Maí-sept 2009: Farið yfir opnar spurningar, kóðun og tölvuskráning á gögnum.
Okt 2009: Alþjóðleg yfirstjórn PISA leggur fram drög að skýrslum um niðurstöður.
Nóv-des 2009: Mat yfirstjórnar PISA á framkvæmd, fyrirlögnum og gögnum.
Jan-apríl 2010: Úrvinnsla á gögnum.
Maí 2010: Fyrstu tölur kynntar OECD og fyrstu drög að skýrslum ákveðin.
Júlí 2010: OECD leggur fram drög að fyrstu alþjóðlegu skýrslunni.
Okt 2010: Framkvæmdaraðilar fá lokaútgáfu alþjóðlegs gagnagrunns.
Des 2010: Skýrslur um niðurstöður og gagnagrunnur gefnar út.