25.05.2011

Opinn umræðufundur um PISA 2009

Þriðjudaginn 31. maí 2011 kl. 14.00-16.00 í sal Námsmatsstofnunar, Borgartúni 7A.
Þetta er fimmti og síðasti fundur vetrarins um niðurstöður PISA rannsóknarinnar. Fundurinn er opinn öllu áhugafólki um grunnmenntun og grunnskóla. Ný fundaröð hefst að hausti.
Efni og upptökur af fyrri fundum eru aðgengileg á heimasíðu Námsmatsstofnunar: www.namsmat.is > Rannsóknir > PISA.
Á fundinum eru eftirfarandi atriði kynnt til umfjöllunar.

• Staða íslenskra grunnskóla og grunnskólanemenda samkvæmt skýrslu OECD um PISA 2009 – Hvað einkennir skóla með góðan námsárangur (bindi 4). Kynntar eru niðurstöður í 4. bindi sem nefnist What Makes a School Successful? Resources, Policies and Practices. Niðurstöður byggja á spurningalista sem skólastjórar svöruðu í samhengi við námsárangur nemenda samkvæmt PISA. Skólarekstur er metinn, vinnulag og skipulag innan skólanna, rekstrarumhverfið, kennararnir og skólaandinn. Í kynningunni eru skoðuð helstu sérkenni íslenskra skóla með samanburði við hin 64 þátttökulöndin.
• Kennslu- og námsaðferðir í grunnskólum í OECD löndum
  Hver er munurinn á kennslu- og námsaðferðum í stærðfræði milli grunnskóla í OECD löndunum? Hvaða aðferðir tengjast góðum árangri í stærðfræði? Eru þær algildar eða ólíkar eftir löndum? OECD hefur gefið út rit sem byggir á  gögnum úr PISA og TALIS rannsóknunum til að svarar þessum spurningum. Helstu niðurstöður eru kynntar.
• Hefur dregið úr aga í grunnskólum á undanförnum áratug?
  OECD gaf nýlega út samantekt á niðurstöðum um aga í tímum í þátttökulöndum PISA frá 2000 til 2009. Hér eru þær niðurstöður kynntar.
• Umræður og fyrirspurnir á milli dagskrárliða. Léttar veitingar.

07.02.2011

Ný fundaröð umræðufunda um niðurstöður PISA er hafin

Fundunum er ætlað að vera vettvangur fyrir áhugafólk um grunnskólamenntun til umræðna um PISA könnun OECD og niðurstöður hennar. Þeir eru haldnir í sal Námsmatsstofnunar að Borgartúni 7A.
Fyrsti fundurinn um PISA 2009 var haldinn 25. janúar s.l. og fjallaði hann um fyrstu 2 bindin í skýrslu OECD og um einkenni lesskilningsverkefna sem íslenskir nemendur eiga ýmist áberandi aðvelt eða erfitt með að leysa. Næsti fundur verður 22. febrúar, kl. 14.00-15.30.
Undir Rannsóknir – PISA hér til hliðar er hægt að nálgast kynningarnar og upptökur af fundunum. Það er einnig aðgengilegt hér:

Umræðufundir um PISA 2009 - Umræðufundir um PISA 2006

07.01.2011

Útgáfa skýrslna vegna lesskimunar í 4. bekk.

Út eru komnar tvær skýrslur vegna lesskimunar í 4. bekk grunnskóla.

Fyrri skýrslan heitir Í framhaldi af lesskimun í fjórða bekk: Hugmyndir að íhlutun og aðferðum. Skýrslan hefur að geyma leiðbeiningar til kennara um hvernig bregðast má við niðurstöðum úr lesskimun sem benda til lestrarvanda nemenda. Skýrslan nýtist öllum þeim sem áhuga hafa á lestrarkennslu og vilja upplýsingar um aðferðir við kennsluna eða fá nýjar hugmyndir að bættri lestrarkennslu. (Hana má nálgast hér)

Síðari skýrslan heitir Skýrsla um þróun og framkvæmd lesskimunar sem hluta af samræmdu könnunarprófi í 4. bekk. Eins og nafnið bendir til lýsir skýrslan þróun lesskimunar sem hluta af samræmdu könnunarprófi í 4. bekk frá því ákvörðun var tekin um að bæta slíku skimunarprófi við prófið til dagsins í dag. Skýrslan hefur að geyma tæknilegar upplýsingar um þróun skimunarprófsins. (Hana má nálgast hér)

Við vonum að skýrslur þessar nýtist áhugasömum og ef frekari upplýsinga eða skýringa er þörf er velkomið að hafa samband í tölvupósti sigsk@namsmat.is

15.12.2010

Matsreglur (svör) við samræmdum prófum 2010 eru nú aðgengilegar á vefnum.

10. bekkur - Íslenska/Enska/Stærðfræði

7. bekkur - Íslenska/Stærðfræði

4. bekkur - Íslenska/Stærðfræði

13.12.2010

Janúar til maí 2011 - Umræðufundir
Mánaðarlegir umræðufundir um niðurstöður PISA 2009. Kynnt nánari úrvinnsla á niðurstöðum fyrir Ísland í alþjóðlegu samhengi. Afmörkuð málefni tekin fyrir líkt og á fyrri umræðufundum um PISA 2006."

Efni fyrri umræðufunda má nálgast hér

06.12.2010

Niðurstöður PISA 2009 rannsóknarinnar.

Niðurstöður OECD-PISA 2009 rannsóknarinnar á lesskilningi og læsi á stærðfræði og náttúrufræði á meðal 15 ára nemenda, eru nú tilbúnar. Ísland tók þátt í rannsókninni í fjórða sinn árið 2009, ásamt 68 öðrum löndum innan og utan OECD. Áhersla rannsóknarinnar í þetta sinn var á lesskilning, á lestur hefðbundinna texta og rafrænna. Niðurstöður um lesskilning á rafrænum textum verða birtar í júní 2011.

Undanfarinn áratug hefur lesskilningi íslenskra nemenda hrakað í hvert sinn sem mælingin hefur verið gerð, þ.e. árin 2000, 2003 og 2006. Nú hefur þróunin hins vegar snúist við og hafa íslenskir nemendur endurheimt sína fyrri stöðu. Einungis 10 af 68 löndum sem tóku þátt í rannsókninni sýna betri frammistöðu en Ísland og einungis 8 af 33 OECD löndum. Þessi breyting er ákaflega mikilvæg og bendir til þess að grunnskólakerfið standi sig afar vel. Frammistaðan í stærðfræði og í náttúrufræði hefur hins vegar ekki breyst marktækt frá fyrri rannsóknum og er þörf á átaki í þeim greinum, sérstaklega í náttúrufræði þar sem frammistaða Íslands er talsvert undir meðaltali OECD landanna.

• Einungis 10 lönd af 68 eru með marktækt betri frammistöðu en Ísland í lesskilningi í PISA 2009 og einungis 8 OECD lönd af 33 hafa marktækt betri lesskilning.
  
• Frammistaðan í stærðfræði og náttúrufræði stendur í stað frá fyrri rannsóknum. Ísland er í 11.-13. sæti í stærðfræði miðað við öll OECD löndin 33 en í 20.-25. sæti í náttúrufræði.
  
• Kynjamunur í stærðfræði og náttúrufræði reyndist ekki vera til staðar á Íslandi lengur á meðal 15 ára nemenda. Í lesskilningi standa stúlkur ennþá drengjum verulega framar, á svipaðan hátt og í nágrannalöndunum.
  
• Breytileiki á milli skóla á Íslandi hefur aukist verulega á síðustu árum og Ísland er ekki lengur á meðal þeirra landa sem hafa allra minnstan mun á milli skóla, eins og áður var.
  
• Dregið hefur saman með Norðurlandaþjóðunum fjórum, Íslandi, Noregi, Svíþjóð og Danmörku í öllum greinum. Framfarir hafa orðið frá 2006 hjá bæði Noregi og Íslandi, sérstaklega í lesskilningi, Danmörk hefur staðið í stað og frammistöðu Svíþjóðar hefur hrakað. Finnland sýnir enn frammistöðu sem er með því besta sem sést i allri rannsókninni.
  
• Lesskilningi á meðal 15 ára nemenda á Íslandi hrakaði jafnt og þétt á tímabilinu frá 2000 til 2006, en nú hefur þróunin snúist við og íslenskir nemendur hafa náð fyrri stöðu sinni aftur.
  
• Talsverður munur er á frammistöðu á Íslandi eftir landshlutum í öllum greinum.

Íslenska skýrslu um niðurstöður PISA 2009 má nálgast á heimasíðu Námsmatsstofnunar (www.namsmat.is), ásamt skýrslum OECD um PISA 2009. Áfram verður unnið að greiningu á niðurstöðum og þær síðar kynntar frekar í skólum og fræðsluumdæmum og á reglulegum fræðslufundum á stofnuninni.

Efni um PISA 2009

Íslenskar niðurstöður

Fréttatilkynning frá OECD

Samantekt helstu niðurstaðna frá OECD

PISA 2009 Results: What Students Know and Can Do. (Volume I)

PISA 2009 Results: Overcoming Social Background. (Volume II)

PISA 2009 Results: Learning to Learn. (Volume III)

PISA 2009 Results: What Mages a School Successful? (Volume IV)

PISA 2009 Results: Learning Trends. (Volume V)

Áætlun fyrir kynningarvinnu á næsta ári er eftirfarandi.

Janúar 2011 - Mynd af skólum
Þeir grunnskólar sem tóku þátt í PISA með 15 eða fleiri nemendur fá upplýsingar um stöðu skólans í lesskilningi, stærðfræði og náttúrufræði. Þar eru meðaltöl og dreifing innan skólans.

Janúar til maí 2011 - Fræðsluskrifstofur
Fræðsluskrifstofur eiga kost á að fá kynningar um skóla á svæðinu. Greint er frá niðurstöðum um færnisvið lesskilnings, flokka lesskilningsverkefna, hæfnisþrep, þróun yfir tíma og kynjamun. Samanburður við niðurstöður sömu nemenda á samræmdum prófum 10. bekkjar í íslensku og stærðfræði. Hægt er að óska eftir frekari greiningu á niðurstöðum PISA.

Janúar til maí 2011 - Umræðufundir
Mánaðarlegir umræðufundir um niðurstöður PISA 2009. Kynnt nánari úrvinnsla á niðurstöðum fyrir Ísland í alþjóðlegu samhengi. Afmörkuð málefni tekin fyrir líkt og á fyrri umræðufundum um PISA 2006.

01.12.2010

Skýrsla með niðurstöðum samræmdra könnunarprófa 2010.

Niðurstöður úr samræmdum könnunarprófum í 4., 7. og 10. bekk 2010 hafa verið teknar saman í skýrslu.
Hana má finna undir „Skýrslur“ hér til hliðar undir liðnum
„Um samræmd próf“

Hana er líka hægt að nálgast hér

12.11.2010

Fyrstu niðurstöður samræmdra prófa í 10. bekk árið 2010

Hægt er að nálgast þær hér.

01.11.2010

Hvar get ég nálgast LEIÐ TIL LÆSIS prófgögnin?

Til að panta aðgang að prófgögnum þarf að hafa samband við Jóhönnu Ellu Jónsdóttir í gegnum johanna@namsmat.is eða síma 550-2400.

Tilgreina þarf fjölda árgang sem keyptur er aðgangur fyrir og hversu margir nemendur eru í hverjum árgangi. Eftir það fær skólinn sendan aðgang og prófendur geta hafist handa.

01.11.2010

Niðurstöður samræmdra prófa

Niðurstöður samræmdra prófa verða tilbúnar á næstu dögum. Einkunnir nemenda verða settar inn á svæði skóla í nokkrum lotum, fyrst einkunnir 10. bekkjar og síðan einkunnir yngri nemenda. Hefðbundnar einkunnir (samræmd einkunn og raðeinkunn) í íslensku og stærðfræði í 10. bekk verða aðgengilegar á fimmtudag og enskan á föstudag. Lesskimun í 4. bekk verður síðan aðgengileg öðru hvoru megin við helgi, ásamt handbók með ráðleggingum um viðbrögð í kennslu. Einkunnir nemenda í 4. og 7. bekk verða síðan aðgengilegar í næstu viku.

Í næstu viku verður einnig aðgengileg ný tegund einkunna, svokölluð færnieinkunn. Við gerð þessara einkunna eru notuð próffræðilíkön sem gera kleift að setja prófatriði og nemendur á sama undirliggjandi kvarða. Er þá unnt að velja ákveðin prófatriði sem eru einkennandi eða lýsa ákveðnum hópum nemenda. Útreikningur einkunna af þessu tagi er frábrugðin hefðbundnum einkunnum.

Um fyrirkomulag einkunnaskila var rætt við nokkra skólastjórnendur sl. haust. Í þeim samtölum komu fram ólík sjónarmið um leiðir. Töldu sumir að rafræn skil einkunna væru fullnægjandi meðan aðrir töldu æskilegt að halda áfram skilum á pappír. Eftir þau samtöl var ákveðið að halda áfram skilum á pappír enn um sinn. Engu að síður höfðu margir skólastjórnendur afhent nemendum einkunnir þeirra áður en prentuð gögn bárust frá Námsmatsstofnun. Nú þegar enn þrengir að í fjármálum ríkisstofnana verður þó ekki hjá því komist að falla frá ákvörðuninni sem tekin var sl. haust. Því verður litið á rafræn skil sem endanleg skil á einkunnum til skólanna.

Heildarniðurstöður, svo sem dreifing einkunna, meðaltöl á landsvísu og eftir landshlutum, verða tilbúnar fyrri hluta næstu viku.

13.09.2010

Nú er vika í að samræmd könnarpróf hefjist. Námsmatsstofnun vill benda skólum á æfingar- eða sýnisverkefni sem unnt er að nálgast undir liðnum „framkvæmd“ hér á vefsíðunni.

Æfingarverkefni fyrir 4. bekk eru ætluð til kynningar á fyrirkomulagi lesskimunarverkefna og annarra verkefna í fyrri lotu íslenskuprófsins (ath. að í seinni lotu er einungis lestrarhlutinn). Í æfingarverkefninu eru sömu fyrirmæli og æfingaratriði og eru í prófinu sjálfu og tvö atriði af hverri gerð.

Sýnispróf fyrir stærðfræði í 10. bekk var nú útbúið vegna þess að í prófinu verða einungis fjölvalsspurningar. Útbúið var sýnispróf sem er sambærilegt að lengd og raunverulega prófið.

Einnig viljum við minna á að æfingarverkefni í ritun fyrir íslensku og ensku í 10. bekk frá því í fyrra eru enn aðgengileg á sama stað á vefsvæðinu.

19.08.2010

NÝ SKÝRSLA

Lögðu nemendur sig alla fram á PISA? Hvernig eru íslenskir skólar miðað við aðra skóla  innan OECD? Skipta fjölskylduaðstæður máli? Hvernig er lesskilningur mældur? Námsmatsstofnun hefur gefið út skýrslu þar sem þessum spurningum er svarað ásamt  fjölda annarra.
 
Skýrslan er í tveimur hlutum og heitir sá fyrri: Þróun lesskilnings 15 ára nemenda og læsis þeirra á stærðfræði samkvæmt PISA árin 2000, 2003 og 2006. Þar er fjallað um samanburð Íslands við önnur lönd, þróun lesskilnings og læsis á stærðfræði á Íslandi miðað við þróunina í öðrum löndum. Svarað er spurningunni hvers mikið nemendur lögðu sig fram frá 2000 til 2006 og hvort að færni á undirþáttum lesskilnings hafi þróast á ólíkan hátt árin 2000, 2003 og 2006.
 
Í síðari hlutanum, Foreldrar – Nemandi – Skóli: Sérkenni íslenskra grunnskóla og tengsl við læsi nemenda á náttúrufræði eftir skólum eru skoðuð sérkenni íslenskra skóla miðað við önnur lönd í OECD. Lýst er stöðu íslenska skóla miðað við aðra skóla innan OECD varðandi viðhorf nemenda, heimili og foreldra og rekstur skólanna sjálfra. Einnig er fjallað um tengsl milli meðallæsis nemenda á náttúrufræði í skólum og þátta sem tengjast heimilisaðstæðum, viðhorfum nemanda og skólastarfs. Í síðari hlutanum eru líka skoðuð tengsl sérkenna íslenskra skóla við læsi nemenda á náttúrufræði. Skoðuð eru tengsl þáttanna í 1. kafla við læsi á náttúrufræði með aðhvarfsgreiningu. Styrkur þeirra tengsla er kannaður og metið hve mikið þættirnir skýra af breytileika í læsi á náttúrufræði í íslenskum skólum.

Að svo stöddu verður skýrslan ekki prentuð heldur einungis gerð aðgengileg á rafrænu formi.  Hér má nálgast skýrsluna

02.06.2010

Árskýrslu Námsmatsstofnunar fyrir árið 2009 má nálgast hér

26.04.2010

Ýmsar upplýsingar varðandi samræmd próf 2010

Skráning vegna stuðningsúrræða og undanþága fyrir samræmd könnunarpróf haustið 2010 hefst í byrjun maí og er opnað fyrir vefaðgang þann þriðja maí.  Nemendagrunnurinn verður opinn til skráninga út skólaárið.  Síðan verða tækifæri til breytinga í ágúst (16 - 27 ágúst).  Framkvæmdaheftið og kynningaefni verður aðgengilegt um leið og vefurinn opnar.
 
Aðgangur að eyðublöðum sem foreldrar / forsjáraðilar skrifa undir verður
opnaður í þessari viku.  Verða eyðublöð sótt með svipuðum hætti og verið
hefur.
 
Nemendagrunnurinn byggir á upplýsingum sem við fengum frá MENTOR líkt og undanfarin ár.  Við fáum endurnýjaðar upplýsingar um bekkjarheiti  og hvaða nemendur verða í hverjum skóla þann 25. ágúst. Skráningar um stuðningsúrræði eða undanþágur fylgja nemendum milli skóla eins og í fyrra. 

11.01.2010

Minnispunktar um próftíma í samræmdum könnunarprófum 2010 (HÉR)

Dagsetningar samræmdra prófa í 4. bekk, 7. bekk og 10. bekk 2010 verða eftirfarandi.

10. bekk
íslenska - mánudagur 20. september 2010
Enska - þriðjudagur 21. september 2010
Stærðfræði - miðvikudagur 22. september 2010

4. og 7. bekk
íslenska - fimmtudagur 23. september 2010
Stærðfræði - föstudagur 24. september 2010

22.12.2009

Umræðufundir Námsmatsstofnunar um TALIS rannsóknina
verða haldnir, einn til tveir í mánuði, klukkan 13:30 til 15:00 á miðvikudögum í vetur í fundarsal Námsmatsstofnunar, Borgartúni 7A. Fyrirlestrarnir byggja á úrvinnslu gagna sem safnað var meðal kennara og skólastjóra á öllu landinu í vor 2008 og bjóða uppá samanburð við OECD-lönd og fleiri lönd. Vonumst til að sem flestir sjái sér fært að mæta.

1. 2. des. 2009. Niðurstöður TALIS: Almennt yfirlit. Fjallað er um viðhorf og skoðanir kennara til eigin kennslu, mat og endurgjöf til kennara, menntun þeirra og starfsþróunarverkefni. Einnig er fjallað um starf og hlutverk skólastjórans í augum kennara og skólastjóranna sjálfra. Niðurstöður eru bornar saman við önnur þátttökulönd TALIS.
2. 9. des. 2009. Starfsþróun kennara: Niðurstöður TALIS benda til þess að kennarar á Íslandi taki fremur lítinn þátt í ýmsum starfsþróunarverkefnum í samanburði við önnur TALIS lönd. Leitað er skýringa á þessu í gagnasafni TALIS. Hver er þörfin fyrir starfsþróun og hvernig má bæta hana? Ný erlend skýrsla byggð á alþjóðlegum TALIS gögnunum um þetta efni verður höfð til hliðsjónar íslensku gögnunum.
3. 13. jan. 2010. Menntun kennara: Er munur á kennurum eftir menntun? Menntunarhópar kennara eru bornir saman á mælikvörðum TALIS. Þessar upplýsingar eru nýttar til þess að greina frekar menntunarþörf íslenskra kennara.
4. 3. feb. 2010. Starfsánægja kennara og trú þeirra á eigin getu: Hvaða þættir hafa áhrif á starfsánægju kennara og trú þeirra á eigin getu? Hvaða þætti er unnt að bæta til þess að auðvelda kennurum og skólastjórum að rækja hlutverk sitt?
5. 24. feb. 2010. Mat og endurgjöf: Hvaða þættir skipta máli varðandi mat á störfum kennara, skólastjóra og skólanna sjálfra? Gerir matið gagn? Hvernig má bæta það og/eða auka?
6. 24. mars 2010. Skólamenning: Má greina ólíka skólahópa á Íslandi eftir starfsháttum og viðhorfum kennara og skólastjóra þeirra? Niðurstöður klasagreiningar kynntar.
   

Skýrslu Námsmatsstofnunar um TALIS rannsóknina má sjá á heimasíðu Námsmatsstofnunar: http://www.namsmat.is

03.12.2009

Íslensku próf fyrir umsækjendur um íslenskan ríkisborgararétt.
um þessar mundir standa yfir próf fyrir umsækjendur um íslenskan ríkisborgararétt. Prófið er hluti af umsóknarferli um ríkisborgararétt og þurfa allir umsækjendur 18 ára og eldri að standast prófið. Prófað er í mæltu máli, rituðu máli, lestri og hlustun. Að þessu sinni þreyta um 250 einstaklingar þetta próf. Prófin eru haldin á höfuðborgasvæðinu, Akureyri, Egilstöðum og Ísafirði.

06.10.2009

Próf fyrir umsækjendur um íslenskan ríkisborgararétt verða haldin vikuna 30. nóvember til 4 desember. Skráning er til 10. nóvember.
Hér má finna nánari upplýsingar um fyrirkomulag prófsins og skoða sýnishorn af prófverkefnum. UPPLÝSINGAR OG SKRÁNING

Prófið miðast við lokamarkmið í grunnnámi í íslensku fyrir útlendinga (240 stundir), samkvæmt námskrá menntamálaráðuneytisins.
Í prófunum skal reynt á tal, hlustunarskilning, ritun og lesskilning.

16.06.2009

Fréttatilkynning frá Námsmatsstofnun
Um OECD TALIS-Teaching and Learning International Survey.
Í dag þann 16. júní 2009 birtir OECD fyrstu niðurstöður þessarar alþjóðlegu rannsóknar á viðhorfum og aðstæðum kennara og skólastjórnenda. Jafnframt er birt skýrsla frá Námsmatsstofnun um hinn íslenska hluta rannsóknarinnar.
TALIS rannsóknin (Teaching And Learning International Survey) er framkvæmd á vegum Efnahags og framfarastofnunarinnar (OECD) og hefur verið nokkur ár í undirbúningi. Menntamálaráðuneytið ákvað að Ísland skyldi taka þátt í henni og fól Námsmatsstofnun að vinna verkið. Rannsókninni er ætlað að fylla upp í þá mynd af skólakerfum landanna, sem þegar hefur fengist úr öðrum alþjóðlegum rannsóknum svo sem PISA, með því að afla gagna frá kennurum og skólastjórnendum um störf þeirra, vinnuumhverfi og aðstæður. Rannsóknin beinir sjónum að kennurum og skólastjórnendum á unglingastigi, (ISCED-2) en á Íslandi var ákveðið að hún myndi einnig fjalla um kennara á grunn- og miðstigi (ISCED-1).

Megináherslur rannsóknarinnar eru á:

• Mat á störfum kennara og þá endurgjöf er þeir fá.
• Starfsþróun kennara.
• Viðhorf og skoðanir kennara um eigin kennslu.
• Hlutverk og starfshætti skólastjórnenda.

24 lönd tóku þátt í rannsókninni og á Íslandi voru spurningalistar lagðir rafrænt fyrir alla kennara grunnskólans ásamt skólastjórum.

Nokkrar niðurstöður rannsóknarinnar eru eftirfarandi:

• Rannsóknin sýnir að starfsánægja kennara er góð hér á landi.

• Tiltrú kennara á eigin getu er með besta móti á Íslandi í samanburði við önnur þátttökulönd TALIS. og mótast af gæðum samskipta þeirra við nemendur, tiltrú þeirra á ákveðinni kennslufræði, góðu skipulagi í kennslustundum, ástundun nýbreytni í kennsluháttum og faglegrar samvinnu, ásamt trú á því að nemendahópur þeirra sé yfir meðallagi.

• Menntun kennara er minni hér á landi en víðast hvar í þátttökulöndum TALIS.
  
• Færri eru með meistaragráðu eða meira og fleiri eru með menntun lægri en háskólagráðu.
  
• Talsvert brottfall er úr kennarastétt eftir fyrsta ár í kennslu.
  
• Fimmti hver kennari tók ekki þátt í neinu starfsþróunarverkefni undanfarna 18 mánuði. Rúmlega 70% kennara taka þátt í starfsþróunarverkefnum í 10 daga eða minna á sama tímabili.
  
• Réttindanám og rannsóknaverkefni eru minna stunduð hér á landi en víða annars staðar í þátttökulöndum.
  
• Áhugi á frekari starfsþróun er minni á Íslandi en víða annars staðar í TALIS- löndum.
  
• Kennarar óska eftir meiri starfsþróun á sviði kennslu nemenda með sértækar námsþarfir, námsmats og um aga- og hegðunarvandamál.
  
• Kennarar hér á landi aðhyllast hugmyndir Constructivisma / hugsmíðahyggju um kennslu meira en í nokkru öðru þátttökulandi. Jafnframt hafna þeir hugmyndum um hefðbundna beina kennslu (Direct transmission).
  
• Kennsluaðferðir karla eru meira í anda hefðbundinnar kennslu en aðferðir kvenna.
  
• Kennarar telja að skólastóri hafi fremur lítil afskipti af kennslunni. Skólastjóri setur skóla og kennurum markmið, en hefur ekki bein afskipti af kennslu “á gólfinu”.  
  
• Aðeins um 40% kennara telja að borin sé virðing fyrir starfi kennara í sveitarfélaginu sem þeir starfa í.

Um nánari niðurstöður vísast til hinnar íslensku skýrslu og skýrslu OECD.
Frekari úrvinnsla gagnanna stendur yfir á Námsmatsstofnun og í samvinnu við kennaramenntunarstofnanir og verður gagnagrunnur rannsóknarinnar aðgengilegur öðrum rannsakendum.
Niðurstöður má nálgast á heimasíðu Námsmatsstofnunar www.namsmat.is þann 16. júní en þar má nálgast íslenskra frumskýrslu um rannsóknina ásamt upphafsskýrslu frá OECD og samantekt rannsóknarinnar, einnig frá OECD.
Fyrirhugað er málþing á vegum menntamálaráðuneytis um niðurstöðurnar í ágúst 2009, en dagsetning verður auglýst síðar.

TALIS - Staða og viðhorf kennara og skólastjórnenda

Creating Effective Teaching and Learning Environments: First Results from TALIS

Creating Effective Teaching and Learning Environments: First Results from TALIS - EXECUTIVE SUMMARY

2.04.2009

Engin samræmd könnunarpróf í 10. bekk vorið 2009.
Þann 30. mars sl., var á Alþingi fellt úr gildi bráðabirgðaákvæði V í lögum nr. 91/2008 um grunnskóla. Ákvæði þetta kvað á um að samræmd könnunarpróf í 10. bekk skyldu lögð fyrir vorið 2009. Því verða engin samræmd könnunarpróf í 10. bekk vorið 2009.
Vegna þessa verður stefnt af fullum krafti á haustprófin. Þau verða eins og áður hefur komið fram, lögð fyrir dagana 14. til 18. september (4. og 7. bekkur, 17. og 18. september og 10. bekkur, 14. til 16. september).
Opið verður fyrir skráningu stuðningsúrræða og undanþága vegna haustprófanna (í öllum árgöngunum) þann 30. apríl til 10. júní.

Eins og kom fram í bréfi til skólastjóra fyrr í þessum mánuði, þarf öll skráning vegna undanþága og stuðningsúrræða að hafa átt sér stað fyrir lok yfirstandandi skólaárs (lokað fyrir skráningu 10. júní).
Aftur verður opið fyrir breytingu á skráningum, vegna flutnings nemenda milli skóla og bekkja, vikuna 17. til 21. ágúst.

27.03.2009

Menntamálaráðuneytið hefur sent frá sér eftirfarandi tilkynningu vegna breytingatillögu sem liggur fyrir alþingi og mun fela í sér að samræmd próf verði ekki haldin í vor verði hún samþykkt.  Hér má sjá tilkynningu ráðuneytisins:

Til þeirra er málið varðar

• Menntamálaráðuneytið vill vekja athygli á því að fyrir Alþingi liggur frumvarp til breytinga á lögum nr. 91/2008 um grunnskóla. Breytingin felur í sér að ákvæði til bráðabrigða V um samræmd könnunarpróf fellur brott. Samkvæmt því verða ekki haldin samræmd könnunarpróf í 10. bekk í grunnskólum í maí 2009 eins og fyrirhugað var.
  
  
• Frumvarpið hefur farið í gegnum þrjár umræður á Alþingi og aðeins er eftir að greiða um það atkvæði. Atkvæðagreiðsla fer ekki fram fyrr en í næstu viku. Allar líkur eru á því að frumvarpið verði samþykkt og mun ráðuneytið senda bréf til allra grunnskóla, skólaskrifstofa, Námsmatsstofnunar og annarra aðila er málið varðar um leið og niðurstaða liggur fyrir.

13.03.2009

Sýnishorn vegna ritgerða í íslensku og ensku fyrir 10. bekk.
Eins og fram kemur í framkvæmdarhefti hefur fyrirkomulagi vegna ritunar/ritgerða í íslensku og ensku verið breytt frá því sem verið hefur.
Ritunarverkefni eru nú í tveimur hlutum „ritun F“ og „ritun G“. Bæði verkefnin eiga að rúmast á einni blaðsíðu, eins og sýnt er í sýnishornunum.
Matsreglur fyrir ritunarverkefnin er að finna í framkvæmdarheftinu í köflum 12.3 til 12.6.
Sýnishornin er að finna undir „samræmd próf – framkvæmd – sýnisefni fyrir 10. bekk“.

11.03.2009

Framkvæmdahefti, skráningarvefur og eyðublöð
vegna stuðningsúrræða og undanþága.

Ágæta skólafólk!
Nú er komið inn framkvæmdahefti vegna samræmdra könnunarprófa í 4., 7. og 10. bekk. Þar sem prófin í 10. bekk hafa fengið hlutverk könnunarprófa mun sama hefti gilda fyrir öll aldursstigin, 10. bekk – vor og haust, 4. og 7. bekk. Framkvæmdaheftið er í pdf-formi, svo hægt verður að prenta það út í heilu lagi eða hvern kafla fyrir sig. Einnig verður sú nýjung í ár, að á svæði skóla verður að finna efnisyfirlit skýrslunnar. Þar verður hægt að opna hvern kafla og lið skýrslunnar fyrir sig og lesa og prenta út eftir þörfum.

Á morgun verða sett inn á vefsvæði skóla eyðublöð vegna stuðningsúrræða og undanþága.

Skáningarvefur vegna samræmdra könnarprófa í 10. bekk í vor hefur verið opnaður.

26.02.2009

Hér að neðan er tilkynning vegna framkvæmdarheftis og skráninga í vorpróf og dagsetninga haustprófa í 4., 7. og 10. bekk.

Dagsetningar haustprófa 2009 í 4., 7. og 10. bekk

16.12.2008

Afhending einkunna í 4. og 7. bekk.

Pökkun einkunna er að ljúka og verða einkunnir keyrðar út til skóla á stór-Reykjavíkursvæðinu í dag. Einkunnir til skóla úti á landi verða sendar í pósti í dag.
Skólar sem ekki höfðu aðgangsorð að einkunnagrunni trufluðu grunninn hjá okkur og verið er að vinna í að leysa það mál. Þegar því er lokið verður hægt að nálgast einkunnir á vefsvæði skólanna á heimasíðu Námsmatsstofnunar. Skólum verða send aðgangsorð og lykilnúmer (6 stafa og 8 stafa), þegar þeirri vinnu er lokið.

4.12.2008

Vinna við úrvinnslu úr samræmdum könnunarprófum í 4. og 7. bekk er nú á lokastigi. Verkið hefur dregist nokkuð vegna takmörkunar á yfirvinnu, vegna vandkvæða í skönnun og fleira. Fjöldi prófhefta með steinskrift (hefti fyrir nemendur með lestrarvanda) hefur tafið skönnun og einnig þurfti að skanna u.þ.b. 1500 prófhefti tvisvar.

Unnið er að því hörðum höndum að einkunnir verði tilbúnar um miðja næstu viku.

10.11.2008

Ágætu skólastjórnendur

Sökum misvísandi upplýsinga sem komu fram í útvarpsviðtali í dag mánudaginn 10. nóvember varðandi hverjir af nemendum 10. bekkjar skuli taka samræmd próf vorið 2009, er rétt að árétta að skv. ákvörðun menntamálaráðuneytisins sem kynnt var nýlega skulu allir nemendur taka prófin, nema þeir sem tóku próf í íslensku, stærðfræði eða ensku síðasta vor og stunda nám í framhaldsskólaáföngum í viðkomandi fagi skólaárið 2008-9.

Eftirfarandi er úr bréfi ráðuneytisins þar sem þessi ákvörðun er kynnt.

Í kjölfar bréfs ráðuneytis, dags. 23. september 2008, um framkvæmd samræmdra könnunarprófa í 10. bekk vorið 2009, hefur orðið vart nokkurrar óánægju með þá ákvörðun ráðuneytisins að allir nemendur 10. bekkjar, einnig þeir sem þreyttu samræmt lokapróf í íslensku, ensku eða stærðfræði vorið 2008, skuli gert að þreyta samræmt könnunarpróf vorið 2009 í sömu grein.

Menntamálaráðherra hefur ákveðið að þeir nemendur 10. bekkjar sem þreyttu samræmt lokapróf í íslensku, ensku eða stærðfræði vorið 2008, hafa lokið grunnskólaprófi í viðkomandi grein og stunda í vetur nám í námsgreininni í framhaldsskóla megi velja hvort þeir þreyti samræmt könnunarpróf í námsgreininni næsta vor.

Virðingarfyllst,
f.h. Námsmatsstofnunar

Júlíus K. Björnsson forstöðumaður

16.10.2008

Ágætu skólastjórnendur.

Vegna erfiðleika sem sköpuðust við framkvæmd könnunarprófs í íslensku í 4. bekk í dag 16. október vill Námsmatsstofnun árétta eftirfarandi:

1. Lesskimunarhluti íslenskuprófsins er ekki hluti af einkunn nemanda og því eiga þau hugsanlegu vandkvæði sem komu upp í dag ekki að hafa áhrif á einkunnir. Skimun á lestri er ætlað að gefa sjálfstæðar upplýsingar og er þessum prófhluta ætlað að vera fyrst og fremst upplýsingagjöf til kennara og nemenda um stöðuna í lestri.
2. Ef skólinn álítur að framkvæmd lesskimunarhlutans hafi á einhvern hátt misfarist eða gengið illa, er skólum frjálst að endurtaka þennan prófhluta síðar þannig að skólinn hafi bestu mögulegar upplýsingar um stöðu nemenda í lestri. Ef skólinn óskar eftir að gera þetta er hann vinsamlegast beðinn að hafa samband við Námsmatsstofnun til þess að fá viðeigandi gögn.

Með bestu kveðjum

f.h. Námsmatsstofnunar

Júlíus K. Björnsson           Sigurgrímur Skúlason
forstöðumaður                 sviðsstjóri prófasviðs

04.09.2008

Velkomin til starfa!
Í byrjun nýs skólaárs býður Námsmatsstofnun nemendur og starfsfólk skóla velkomna/-ið til starfa. Okkar von er að starfið framundan leggist vel í mannskapinn. Um leið og við þökkum samstarf liðinna ára vonumst við til að eiga áframhaldandi gott samstarf við ykkur á byrjandi vetri.

04.09.2008

Breytingar á breytingar ofan!
Í kjölfar breytinga á grunnskólalögum og reglugerð um samræmd próf, sem er í vinnslu þessa stundina, er ljóst að miklar breytingar verða á samræmdum prófum næsta vor. Prófað verður í þremur fögum, íslensku, ensku og stærðfræði. Eins og nýju grunnskólalögin gera ráð fyrir verða samræmd próf í 10. bekk könnunarpróf sem meta stöðu einstakra nemenda m.v. jafnaldra, líkt og prófin í 4. og 7. bekk. Ekki verður lengur val um að taka samræmd próf, heldur eiga allir nemendur 10. bekkjar að taka prófin í fyrrgreindum þremur fögum. Um undanþágur gilda sömu reglur og um nemendur 4. og 7. bekkjar. Prófin verða lögð fyrir að hausti í fyrsta skipti haustið 2009. Prófin nú í vor verða könnunarpróf í fyrrgreindum þremur fögum, en lögð fyrir í lok vetrar eins og venjan hefur verið undanfarin ár. Prófin í vor munu ekki gegna hlutverki inntökuviðmiða fyrir framhaldsskóla, enda verður hlutverk þeirra breytt þá þegar frá því sem verið hefur.

04.09.2008

Uppbygging prófanna í 10. bekk
Í skoðun er hvaða breytinga er þörf á innihaldi og uppbyggingu prófanna. Í því sambandi verður rætt við menntamálaráðuneyti, fagfélög kennara og samtök kennara og skólastjórnenda. Flestar breytinganna munu koma til framkvæmda haustið 2009. Þó er ekki ólíklegt að einhverjar breytingar komi til framkvæmda strax vorið 2009. Það ætti að skýrast um mánaðamót september/október.

Nánari upplýsingar verða sendar skólastjórum í lok þessarar viku. Nemendum og forráðamönnum verður einnig sent bréf í lok vikunnar. Þá verður framkvæmdahefti um samræmd könnunarpróf í 10. bekk birt á netinu upp úr miðjum mánuði eða fljótlega eftir að reglugerð liggur fyrir.

04.09.2008

Nýir starfsmenn Námsmatsstofnunar
Teknir eru til starfa tveir grunnskólakennarar þau Auður Aðalsteinsdóttir og Skúli Pétursson.
Þau munu koma að vinnu við samræmd próf.

Þá hefur hafið störf Karl Fannar Gunnarsson, BA í sálfræði. Hann mun m.a. sjá um tölfræðiúrvinnslu samræmdra prófa og PISA rannsóknarinnar.

Ráðinn hefur verið sálfræðingur, Jóhanna Ella Jónsdóttir. Hún mun hafa umsjón með útgáfu staðlaðra matstækja og prófa ásamt því að miðla upplýsingum vegna þeirra.

30.05.2008

Námsmatsstofnun hefur gefið út nýtt rit um fræðilegan grundvöll og túlkun á WPPSI-RIS.
Í ritinu eru tekin saman gögn um fræðilegan grundvöll, áreiðanleika og réttmæti WPPSI-RIS. Fjallað er um túlkun allra undirprófa og heildartalna í prófinu. Efni af þessu tagi hefur ekki birtst áður á íslensku og ætti að styrkja klíníska notkun prófsins. Mikið af tölfræðiefni er birt í ritinu sem nýtist við túlkun og samanburð mælitalna undirprófa og greindartalna. Með útgáfu á þessu efni eru gögn til túlkunar á WPPSI-RIS svipuð og við túlkun á WISC-IVIS. Tölfræðiefnið í ritinu hefur ekki birst áður og var unnið sérstaklega fyrir útgáfu ritsins. Loks er einni aðferð við túlkun á prófinu útskýrð og því lýst hvernig tölfræðiefni í ritinu er notað í hverju þrepi túlkunar á greindartölum og mælitölum undirprófa.

Hægt er að panta ritið undir Pantanir.

30.05.2008

Einkunnir úr sjúkraprófum og eldri einkunnir
Einkunnum nemenda sem þreyttu sjúkrapróf verður bætt í nemendagrunninn að morgni þess 3. júni. Jafnframt verður einkunnum nemenda sem þreyttu próf árin 2006 eða 2007 bætt í grunninn.

30.05.2008

Lokafrágangur einkunna
Lykilorð til að nálgast einkunnir verða orðin virk um klukkan 9, einkunnir verða komnar inn um klukkan 12. Jafnvel fyrr ef síðustu handtök við frágang einkunna ganga snurðulaust.

28.05.2008

Fréttir af einkunnaskilum
Nú er unnið hörðum höndum að margvíslegum frágangsverkefnum og 'gæðaferlum' sem nauðsynleg eru áður en skil einkunna eru möguleg, t.d. ganga úr skugga um að skönnun hafi gengið snurðulaust, prófgögn séu rétt merkt, öll prófgögn séu til staðar og atriði er lúta beint að frágangi einkunna.

Stefnt er að því að setja einkunnir inn í gagnagrunn Námsmatsstofnunar á föstudag. Þá verða þær aðgengilegar skólastjórnendum með þeim hætti sem kynntur var í tölvupósti í gærkveldi. Geta skólar þá sótt bæði yfirlit fyrir bekki og einstaklinga.

Niðurstöður fyrir nemendur sem þreyttu sjúkrapróf verða þó ekki tilbúnar fyrr en eftir helgi.

Einkunnir verða síðan settar inn í gagnagrunn Menntamálaráðuneytis fyrir framhaldsskóla (INNU) um miðja næstu viku. Nemendur þurfa því ekki að skila samræmdum einkunnum með umsóknum sínum til framhaldsskóla.

13.05.2008

Skil á einkunnum
Samkvæmt viðmiðunartíma í reglugerð um samræmd próf skal Námsmatsstofnun skila einkunnum 24 dögum eftir síðasta próf. Í ár fellur þessi dagsetning á sunnudag 1. júní. Undanfarin ár hefur tekist að skila einkunum nokkrum dögum fyrir viðmiðunardag reglugerðar og vonast starfsmenn prófadeildar eftir að það takist einnig þetta árið. Það kemur hinsvegar ekki í ljós fyrr en nær dregur hvort svo verður.

25.02.2008
Dagsetning á umsókn um frávik
 
Misræmi í dagsetningum um lokaskiladag á fráviksbeiðnum hefur verið leiðrétt. Miðað er við að umsóknir um frávik verði komnar inn eigi síðar er 15 mars.  Þetta er sú dagsetning sem fram kemur á umsóknareyðublaði sem foreldrar skrifa undir.  Dagsetningu sem fram kemur í skráningagrunni hefur verið breytt.