02.02.2012
Kæri LtL notandi
Staða LtL: Lesfimi fyrir 1. bekk hefur ekki verið nógu skýr. Þessi útgáfa prófsins hefur einungis verið stöðluð miðað við lok skólaársins. Ástæðan er sú að höfundar töldu LtL: Sjónrænn orðaforði nýttist almennt betur á fyrsta ári og því var einungis gerð ein útgáfa LtL: Lesfimi fyrir 1. bekk. Meðal annars þess vegna verða ekki sett inn túlkun eða lýsing á niðurstöðum fyrir LtL: Lesfimi fyrir 1. bekk að sinni. Tölulegar niðurstöður sem prófið gefur verður því að túlka með öðrum hætti en venja er.
Um niðurstöður fyrir þá nemendur sem LtL: Lesfimi fyrir 1. bekk hefur verið lagt fyrir nú í janúar eða desember er það að segja að einkunnin Leshraði sýnir leshraða barnsins. Raðeinkunn fyrir leshraða endurspeglar stöðu nemandans miðað við maímánuð. Hana er EKKI unnt að nota með þeim hætti sem venja er um raðeinkunnir. Lág tala getur ekki sagt til um að staða nemanda sé slök, þeir ættu upp til hópa að fá lága raðeinkunn vegna þess hve lestrarfærni þróast hratt á þessum aldri. Miðlungs eða hærri raðeinkunnir ætti að túlka þannig að nemandinn sé kominn vel af stað í lestri, SÉRSTAKELGA BER AÐ VARAST að líta svo á að staða nemanda sé undir væntingum út frá niðurstöðum frá desember / janúar fyrirlögn. Þegar litið er á leshraðann gefa ákveðnar niðurstöður til kynna að leshraði upp á nálægt 25 orð á mínútu megi túlka sem "lágmarks æskileg staða nemanda við lok 1. bekkjar" að mati íslenskra kennara. Leggið því áherslu á leshraðann í þessu tilviki.
Upphaflega töldu höfundar að ekki yrði þörf fyrir LtL: Lesfimi fyrir 1. bekk fyrr en við lok skólaárs. Þess vegna var einungis gerð ein útgáfa hennar fyrir 1. bekk og gögnum ekki safnað fyrr en í maí. Reynist þörfin meiri verður bætt úr því. Jafnframt er full ástæða til að endurskoða viðmiða að baki LtL: Lesfimi fyrir 1. bekk í vor.
kær kveðja
Jóhanna Ella Jónsdóttir & Sigurgrímur Skúlason
Námsmatsstofnun
24.01.2012
STARFSFÓLK ÓSKAST VIÐ PISA
Starfsfólk óskast við PISA rannsóknina vor 2012
Námsmatsstofnun leitar að: starfsfólki við alþjóðlega menntarannsókn OECD sem nefnist PISA (Programme for International Student Assessment). Rannsóknin fer fram á tímabilinu 27. febrúar til 30. mars 2012.
Starfið felst í fyrirlögn á prófi og spurningalista í 10. bekk grunnskóla. Starfið krefst fyrst og fremst öryggis í framkomu, reynslu af starfi með unglingum, skipulags og samstarfshæfileika.
Umsóknarfrestur er til 10. febrúar. Hafið samband við Óskar í síma 550-2400 eða með tölvupósti á Óskar.
Starfsfólk óskast við PISA rannsóknina sumar 2012
Námsmatsstofnun leitar að: starfsfólki í sumar við stóra alþjóðlega menntarannsókn OECD sem nefnist PISA (Programme for International Student Assessment). Í þessari rannsókn er metin færni grunnskólanemenda í lesskilningi stærðfræði og náttúrufræði.
Starfið felst í yfirferð á úrlausnum grunnskólanemenda á verkefnum ásamt tölvuinnslætti. Starfið krefst nákvæmni og góðra samstarfshæfileika.
Umsóknarfrestur er til 10. febrúar. Hafið samband við Óskar í síma 550-2400 eða með tölvupósti á Óskar.
15.12.2011
Frétt um niðurstöður Íslenskuprófs
Niðurstöður úr Íslenskuprófi fyrir umsækjendur um íslenskan ríkisborgararétt hafa verið póstlagðar.
Þær ættu að berast próftökum öðru hvoru megin við helgina.
29.11.2011
Frétt af úrvinnslu Samræmdra prófa 29. 11. 2011
Nú eru birtar niðurstöður um meðaltöl einstakra skóla á samræmdum könnunarprófum í 4. 7. og 10. bekk. Eins og áður eru einungis birtar niðurstöður þegar 11 eða fleiri nemendur eru á bak við meðaltöl. Niðurstöðurnar eru, eins og ávallt, birtar á normaldreifða einkunnastiganum þar sem landsmeðaltal er 30. Almennt má líta svo á að skólar með meðaltal á bilinu frá 27-28 til 32-33 "liggi nærri landsmeðaltali". Ástæður þessa í "Frétt af úrvinnslu Samræmdra prófa 04. 11. 2011" neðar á þessari síðu, svo og eiginleika normaldreifðu einkunnanna.
Þegar litið er á meðaltöl skóla á samræmdum könnunarprófum er nauðsynlegt að hafa í huga að merking þeirra er ólík niðurstöðum einstakra nemenda, meðaltölin eru EKKI einkunn skólanna. Hver árgangur er samsettur úr ólíkum hópi nemenda, hlutföll sterkra og slakra námsmanna eru breytileg. Þannig getur meðaltal skólans breyst milli ára vegna ólíkra nemendahópa þó svo að skólastarf sé með sama hætti ár frá ári. Allnokkrar sveiflur eru milli ára hjá minni skólum en sveiflur milli ára eru litlar hjá stærri skólum. Ástæðu þessa má rekja til þess að hver árgangur skólans er í raun tilviljanakennt úrtak barna sem elst upp eða býr á ákveðnu svæði, og þegar úrtök eru lítil geta áhrif af breytileika milli úrtaka orðið töluverð. Það er af þessari ástæðu sem hæstu og lægstu meðaltöl sjást alla jafna hjá litlum skólum. Athugun á meðaltölum skóla yfir nokkurra ára tímabil sýndi að um 93% meðaltala hjá skólum með fleiri en 50 nemendur lágu á bilinu frá 26 til 34 á normaldreifða einkunnastiganum. Þegar horft er til skóla með 11 til 20 nemendur eru um 70% skólameðalta á þessu bili. Þetta endurspeglast einnig í því að dreifitala skólameðalta í minnstu skólunum er þrefalt stærri en dreifitala skóla með 50 eða fleiri nemendur. Því er full ástæða til að hafa í huga að meðaltöl skóla eru misstöðug eftir stærð árganga.
15.11.2011
Frétt 15. 11. 2011
Prófgögn nemenda eru á leið í skóla. Prófgögn út áland voru póstlögð í gær og verið er að keyra út prófgögn á höfuðborgarsvæðið. Prófgögn nemenda hafa nú verið endursend skólum um nokkurra ára skeið. Tilgangurinn er að kennari geti nýtt sér úrlausnir með nemanda ef ástæða er til og einnig að gögnin berist nemendum og foreldrum.
14.11.2011
Frétt 14. 11. 2011
Niðurstöður lesskimunar í 4. bekk voru settar inn á vefsíðu Námsmatsstofnunar um helgina. Þessar niðurstöður sýna hvort nemandi er í áhættuhóp vegna veikleika í færnisviðum sem liggja til grundvallar lestrarnámi, hljóðkerfisvitund og málskilningi. Niðurstöðurnar eru settar fram með einfaldari hætti í ár en áður. Þegar lesskimun er opnuð svæði skólastjóra birtist tafla yfir þá nemendur sem niðurstöður gefa vísbendingum um veikleika hjá, aðrir nemendur eru ekki listaðir upp. Í töflunni er tilgreint hvort vísbendingar eru um að veikleiki liggur á sviði hljóðkerfisvitundar, málskilnings eða á báðum sviðum. Eins og fram hefur komið eru einungis listaðir upp þeir nemendur sem vísbendingar eru um veikleika hjá. Í þeim tilvikum sem ekki er slík vísbending hjá neinum nemanda skólans kemur því ekki upp tala heldur skilaboð þessa efnis.
08.11.2011
Frétt af úrvinnslu Samræmdra prófa 08. 11. 2011
Leið til læsis vefurinn er lokaður til 10. Nóvember vegna uppfærslu og endurbóta.
04.11.2011
Frétt af úrvinnslu Samræmdra prófa 04. 11. 2011
Nú eru birtar niðurstöður um meðaltöl einstakra sveitarfélaga á samræmdum könnunarprófum í 4. 7. og 10. bekk. (pdf skjal) Einungis eru birtar niðurstöður þegar 11 eða fleiri nemendur eru á bak við meðaltöl. Ef nemendur eru færri er sveitarfélagi sleppt úr viðkomandi töflu.
Niðurstöðurnar eru, eins og ávallt, birtar á normaldreifða einkunnastiganum sem Námsmatsstofnun hefur notað síðan 2004, kvarði sem kallaður er grunnskólaeinkunn.
Eitt af hlutverkum samræmdra prófa er að gefa skólum kost á samanburði á stöðu sinni milli ára. ýmsar aðferðir eru notaðar til að gera niðurstöður prófa samanburðarhæfar. En, til að rifja upp ástæður þess að niðurstöður prófa eru almennt ekki samanburðarhæfar eru þær að eiginleikar prófatriðanna eða spurninganna á hverju prófi fyrir sig eru ólíkir. Þetta veldur því að beita þarf sérstökum aðferðum til að gera niðurstöður tveggja prófa sem samin eru í sama tilgangi sambærilegar. Við gerð samræmdra prófa er stuðst við forprófanir til að gera þyngd og aðgreiningareiginleikum prófanna eins svipaða og unnt er frá einu ári til annars. Með þessu móti hefur alla jafna tekist að gera prófin mjög svipuð frá einu ári til annars, en engu að síður er ávallt einhver munur á þyngd prófanna og dreifingu einkunna.
Nokkrar leiðir eru færar til að gera niðurstöður prófa sambærilegar milli tímapunkta eða milli mælinga á ólíkum færnisviðum. Ein leið er að halda prófatriðum leyndum og nota sama próf oftar en einu sinni. Önnur leið er að leggja nýtt próf fyrir hluta próftaka og beita próffræðilegum aðferðum til að finna tengsl sem gera niðurstöðu nýja prófsins jafngildar niðurstöðum eldra prófs. Þessi leið krefst þess í raun að prófatriðum sé haldið leyndum og prófatriði einungis birt þegar hætt er að nota hverja prófútgáfu fyrir sig. Þessi leið er ekki fær hérlendis sökum fámennis, nefna má dæmi um að nýjar útgáfur ACT prófsins eru lagðar fyrir úrtak u.b.þ. 5000 próftaka.
Önnur leið er að nota tengipróf sem lagt er fyrir samhliða öðrum prófum til að tengja einkunnir á nýja prófinu við einkunnir á eldra prófinu. Slíkar aðferðir voru notaðar á samræmdu stúdentsprófunum. Enn ein leið er að varpa stigatölum á prófi á einkunnakvarða með þekkta eiginleika. Algengast er að nota annaðhvort normaldreifingu eða jafna dreifing sem grunn fyrir slíkar einkunnir. Jöfn dreifing hentar vel til að skoða niðurstöður einstaklinga en normaldreifing hentar betur til að vinna með niðurstöður hópa. Þessar einkunnir hafa þann kost að vera stöðugar milli ára og sambærilegar milli prófa.
Raðeinkunnir fylgja jafnri dreifingu og er birt með niðurstöðum samræmdra prófa til að túlka niðurstöður einstaklinga. Þær eru náskildar prósentum.
Grunnskólaeinkunn fylgir normaldreifingu og hefur hún meðaltal 30 og staðalfrávik 10. Þetta þýðir að á landsvísu er meðaltal í hverri námsgrein ávallt 30. Þegar horft er á meðaltal sveitarfélags má meta það út frá landsviðmiðinu 30 hvernig nemendur þar hafa staðið sig miðað við alla nemendur á landinu. Þetta á einnig við um meðaltöl landshluta eða skóla. Staðalfrávik segir til um dreifingu nemenda innan hvers hóps. Ef staðalfrávik skóla eða sveitarfélags er hærra en gerist á landsvísu er dreifing nemenda þar meiri en almennt gerist, til dæmis að algengara sé að nemendur séu mjög háir eða lágir eða að einhverjir nemendur skeri sig frá í hóp sem almennt er sterkur eða slakur námslega. Ef hinsvegar staðalfrávik er lágt er minni dreifing í hópnum en gengur og gerist. Til dæmis að hvorki séu sterkir eða slakir námsmenn í hópnum.
02.11.2011
Frétt af úrvinnslu Samræmdra prófa 02. 11. 2011
Fyrstu niðurstöður samræmdra könnunarprófa í 4. og 7. bekk eru komnar á vefsíðu Námsmatsstofnunar (fyrstu niðurstöður hér). Þar eru töflur sem sýna frammistöðu eftir landshlutum, meðaltöl á einstökum prófþáttum og einnig dreifingu einkunna.
Byrjað er að pakka prófgögnum til endursendingar til skóla. Búið er að ganga frá 10. bekk en 4. og 7. verður pakkað í vikunni.
Á öðrum vígstöðum er unnið að því að ganga frá niðurstöðum lesskimunar. Stefnt er að því að koma þeim inn á svæði skóla á föstudaginn.
01.11.2011
Frétt af úrvinnslu Samræmdra prófa 01. 11. 2011
Unnið er að lagfæringum á einkunnagrunninum sem stendur. Stefnt að því að hann opni seinnipartinn eða snemma í fyrramálið.
31.10.2011
Frétt af úrvinnslu Samræmdra prófa 31. 10. 2011
Einkunnir nemenda í 4. og 7. bekk eru nú aðgengilegar skólastjórnendum. Verið er að vinna í töflum með bekkjaryfirliti og geta unnt að sækja þau í EXCEL skrá.
Fyrstu niðurstöður, eftir landshlutum, verða til í fyrramálið. Niðurstöður eftir sveitafélögum verða síðan unnar í framhaldi.
27.10.2011
Frétt af úrvinnslu Samræmdra prófa 27. 10. 2011
Í gær lauk gagnahreinsun og eftirvinnsluferlum fyrir 4. og 7. bekk. Nú er unnið að frágangi einkunna. Stefnt er að því að koma einkunnum fyrir þessa bekki inn á svæði skóla á morgun.
21.10.2011
Frétt af úrvinnslu Samræmdra prófa 21. 10. 2011
Fyrstu niðurstöður samræmdra könnunarprófa í 10. bekk eru komnar á vefsíðu Námsmatsstofnunar (fyrstu niðurstöður hér). Þar eru töflur sem sýna frammistöðu eftir landshlutum, meðaltöl á einstökum prófþáttum og einnig dreifingu einkunna.
Enn er unnið að því að lagfæra eyður og kennitölur í gagnaskrám. Það er áberandi hve algengt er að vandamál af þessu tagi hópast saman á bekki. Í 4. bekk kemur t.d. um það bil helmingur þeirra sem nota ljósa blýanta í innan við 10 bekkjum.
19.10.2011
Frétt af úrvinnslu Samræmdra prófa 19. 10. 2011
Í dag leitum við að eyðum í prófheftum í íslensku í 4. bekk. Svo er 7. bekkur framundan. Þessar eyður eru ýmist prófatriði sem nemendur hafa ekki svarað, eða tilkomnar vegna þess að notaður hefur verið blýantur sem skanninn skynjar ekki.
Þegar við erum á kafi í seinni törninni við þessa leit að eyðum þetta árið langar okkur að koma því að, að hafa komið upp nokkur tilvik þar sem svarblað nemanda hefur verið autt að öllu eða miklu leyti. Þegar haft er samband við skóla reynist nemandinn hafa fært svörin inn í prófheftið. Þegar skólinn hefur varðveitt prófheftin er unnt að bjarga stöðunni og fá svör nemandans frá skólanum. Því getur verið mjög mikilvægt að skólar haldi vel utan um prófgögn. Að auki verður þá unnt er að dreifa þeim aftur til nemenda þegar svarblöð, ritgerðir og skönnuð hefti berast aftur til skólanna.
18.10.2011
Frétt af úrvinnslu Samræmdra prófa 18. 10. 2011
Nú er skönnun á öllum prófgögnum lokið. Enn er unnið er við leit að eyðum í 4. og 7. bekk og að lagfæra skrár þar sem þess er þörf. Talsverður tími fer einnig þessa dagana í að skoða mál nemenda sem ekki hafa komið upp í yfirliti skóla.
Á milli þessara verka er byrjað að slá inn spurningalsita kennara auk þess sem gripið er í verk vegna undirbúnings prófanna næsta ár þegar tími gefst.
Á tölvusviðinu er unnið að því að opna bekkjaryfirlit.
14.10.2011
Frétt af úrvinnslu Samræmdra prófa 14. 10. 2011
Einkunnir nemenda í tíunda bekk eru komnar inn í grunninn. Skólastjórnendur geta nálgast þær og prentað yfirlit fyrir einstaka nemendur en hópyfirlit verða virk eftir helgi.
Prófgögn nemenda í 10. Bekk verða send aftur í skóla að lokinni úrvinnslu allra einkunna.
Bæklingur með meðaltölum eftir landshlutum og dreifingu einkunna á prófunum er í vinnslu.
Á milli þess sem unnið er að hreinsun gagna er hafin vinna við að slá inn svör úr spurningalistum kennara og einnig er auðvitað unnið að gerð prófverkefna og undirbúningi forprófana.
13.10.2011
Frétt af úrvinnslu Samræmdra prófa 13. 10. 2011
Einkunnir fyrir 10 bekk eru komnar til umsjónarmanns gagnagrunnsins. Unnið er að því að setja þær inn. Skólastjórnendur geta í framhaldi af því prentað yfirlit fyrir einstaka nemendur og einnig yfirlitsblöð fyrir bekki. Skólastjórnendum verður sendur tölvupóstur þegar unnt verður að nálgast einkunnirnar.
Í gær var byrjað að leita að eyðum í prófgögnum í stærðfræði í 4. og 7. bekk. Eru þetta fyrstu skrefin í lokavinnslu á gögnum fyrir þau próf.
Skönnun hefur gengið þokkalega. Nokkuð er þó um að óvönduð vinnubrögð tefji þá vinnu. Til dæmis þegar límmiðar eru settir skakkt á prófgögn eða ekki staðsettir í reit fyrir límmiða. Að mati umsjónarmanns skönnunar hefur þeim skólum fjölgað sem ekki vanda nægjanlega þessa vinnu. Einnig hefur krot og ýmis sóðaskapur aukist hjá nemendum. Einkum hjá 4. bekk, sem á árum áður var til fyrirmyndar miðað við eldri bekkina.
11.10.2011
Frétt af úrvinnslu Samræmdra prófa 11. 10. 2011
Í dag er unnið að frágangi einkunna í 10. bekk og "prófarkalestri" á þeim. Prófarkalestur á einkunnum felst í því að athuga hvort stigatölur falli að einkunnabilum með eðlilegum hætti, að einsleitur stígandi sé í einkunnum með tilliti til stigatalna og að tengsl ólíkra tegunda einkunna séu með eðlilegum hætti. Í þessari vinnu eru því prentaðar allstórar töflur sem rýna þarf glöggt í.
Stefnt er að því að unnt verði að byrja að flytja einkunnir inn í gagnagrunninn seinnipartinn í dag. Það þýðir að þær verði aðgengilegar skólum á morgun eða hinn.
Skönnun á gögnum fyrir 4. og 7. bekk er vel á veg komin. Byrjað verður að athuga eyður í prófgögnum þeirra bekkja strax og 10. bekkur er frá. Hefst þá önnur lota í eftirvinnslu þar sem fara verður gegnum öll sömu verkferli og við höfum unnið að vegna 10. bekkjar undanfarið - en þá með tvo árganga undir og níu ólíkar gerðir prófgagna.
11.10.2011
Frétt af úrvinnslu Samræmdra prófa 11. 10. 2011
Enn eru fáein mál óleyst er varða prófgögn og að henda reiður á öllum nemendum. Vonast er til að því ljúki í dag. Þegar því lýkur verða skipanaskrár fyrir einkunnir í 10. bekk keyrðar og einkunnir "prófarkalesnar".
10.10.2011
Frétt af úrvinnslu Samræmdra prófa 10. 10. 2011
Enn er unnið að leita uppi prófgögn sem ekki parast rétt ritgerðir og svarblöð. Dagurinn virðist ætla að fara allur í þessa vinnu.
07.10.2011
Frétt af úrvinnslu Samræmdra prófa 07. 10. 2011
Þessa stundina er unnið við að sameina skrár með svarblöðum og ritunarverkefnum í 10. bekk. Þá koma jafnan fram atriði sem tékka þarf á, til dæmis ef handskrifaðar kennitölur mislesast við skönnun eða ef sama kennitala kemur fram tvisvar. Leita þarf uppi öll slík prófgögn og komast að hinu sanna í málinu. Einnig er verið að setja inn í skrár prófgögn þar sem einhver frávik valda því að taka þarf þau í vinnslu sérstaklega. Getur þessi vinna reynst tímafrek en vonast er til að þessi mál klárist í dag.
06.10.2011
Frétt af úrvinnslu Samræmdra prófa 06. 10. 2011
Helsta viðfangsefnið þessa dagana er úrvinnsla einkunna í 10 bekk. Einnig er að hefjast villuleit í prófgögnum frá 4. og 7. bekk.
Stefnt er að því að einkunnir í 10. bekk liggi fyrir eftir helgi. Fyrir liggur að fjögur prófatriði verða felld út. Í reynd þýðir það að allir fá stig fyrir þau atriði. Um er að ræða þrjú atriði í stærðfræði og eitt í íslensku. Prófatriði 4 og 47 verða felld út úr stærðfræði vegna mistaka í uppsetningu. Atriði 44 í stærðfræði er fellt úr vegna ónákvæmni í forsendum sem endurspeglast í svörum nemenda. Í íslensku er atriði 54 fellt út vegna þess að svör nemenda benda til að þar reyni um of á námsefni 10. bekkjar eða eldri.
Á eftirfarandi myndum má sjá frammistöðu nemenda á þessum prófatriðum eftir fimm færniflokkum. Á myndunum er fyrsti svarmöguleiki blár, sá annar rauður, sá þriðji grænn og sá fjórði fjólublár.
03.10.2011
Frétt af úrvinnslu Samræmdra prófa 03. 10. 2011
Yfirferð á ritgerðum í 10. Bekk er lokið. Nú eru öll prófgögn komin í hús og áhersla færist á ýmis eftirlits og tékkferli, gæðastjórnun er það víst kallað á íslensku. Talsverð vinna fer ávallt í þennan hluta úrvinnslu. Þrátt fyrir skýr fyrirmæli laumast ávallt einhverjir nemendur til að nota tússpenna, skrautpenna eða of ljósa blýanta. Í öðrum tilvikum vantar hluta krossa, t.d. aftan á svarblað, og hefur í sumum tilvikum komið í ljós við eftirgrennslan að nemendur hafi svarað heilu eða hálfu prófunum í prófheftin.
Samhliða er úrvinnsla einkunna undirbúinn. Meðal annars eru skoðaðar niðurstöður atriðagreiningar og tekin endanleg ákvörðun um prófatriði þegar athugsemdir hafa komið fram.
29.09.2011
LÆSI DRENGJA
Á fimmtudaginn 29. september birtist í Fréttablaðinu ítarleg umfjöllun um kynjamun hjá grunnskólanemendum í Reykjavík þar sem kom fram að hlutfall drengja sem geta ekki lesið sér til gagns er margfalt á við stúlkur. Hins vegar er líðan stúlkna lakari en drengja og eykst bilið á milli kynjanna frá miðstigi til loka unglingastigs. Niðurstöður sem lýst er í greininni voru unnar af Almari M. Halldórssyni, verkefnisstjóra PISA hjá Námsmatsstofnun í tveimur skýrslum til aðgerðahóps hjá Menntasviði Reykjavíkur sem skilaði tillögum að úrbótum í vikunni til Reykjavíkurborgar.
Úrdrátt úr greininni má finna hér
Í þessu samhengi er vert að benda á að fyrir nokkrum árum vann Námsmatsstofnun ítarlega skýrslu um kynjanum á Íslandi samkvæmt PISA 2006 og samræmdum prófum og má finna hana hér
Í skýrslu Námsmatsstofnunar um PISA 2009 má lesa frekar um kynjamun í lesskilningi. Skýrsluna má finna hér
29.09.2011
Frétt af úrvinnslu Samræmdra prófa 29. 09. 2011
Nú hafa öll prófgögn borist í hús - að undanskildum gögnum frá þrem skólum. Yfirferðahópar bíða eftir þessum prófgögnum til að klára yfirferð. Jafnframt er búið að skanna öll svarblöð sem borist hafa (úr tíunda og sjöunda bekk). Töluvert er einnig búið að skanna af ritgerðum í íslensku og ensku í tíunda bekk. Ritgerðir og stafsetning í fjórða og sjöunda fara gegnum tvö yfirferðateymi og því eru þau prófgögn ekki komin í skannann í sama mæli. Sem stendur eru það hefti II í íslensku í fjórða bekk og lesskimun í fjórða bekk sem verið er að skanna. Byrjað er að fara villur og vafamál í gögnum, t.d. skoða próf þar sem margar eyður eru. Einnig er í gangi vinna við að skoða svör nemenda við prófatriðum sem spurningar hafa verið settar við eða koma út með öðrum hætti en ætlað var.
28.09.2011
Frétt af úrvinnslu Samræmdra prófa 28. 09. 2011
Prófgögn fyrir 10. bekk hafa borist frá um það bil 90-95% skóla. Einungis eru ókomin prófgögn um 1-200 nemenda í 10. bekk. Yfirferðateymi í íslensku og ensku í 10. bekk bíða eftir þessum gögnum til að ljúka sinni vinnu.
Móttaka og skráning hefur gengið vel þó eru ávalt nokkrir þar sem ekki hefur verið gengið frá gögnum á viðeigandi hátt og þetta ferli orðið tímafrekara fyrir vikið.
26.09.2011
Frétt af undirbúningi Samræmdra prófa 26. 09. 2011
Yfirferðarhópar hafa unnið stíft um helgina. Samræmitékk hafa verið sett inn u.þ.b. einu sinni á dag. Hópurinn sem fer yfir íslensku í 10. Bekk varð uppiskroppa með ritgerðir á sunnudeginum, þau bíða nú eftir að ritgerðir berist frá u.þ.b. 30 skólum sem eru ókomnir í hús.
Enn hefur ekki verið tekin ákvörðun um meðferð prófatriða í stærðfræði sem villur reyndust vera í. Þau verða skoðuð í ljósi gagna um svör nemenda við þeim. Hér að neðan er mynd sem sýnir hlutfall réttra svara við atriði 4 eftir færni nemenda. Á þessari mynd er færni nemenda brotin upp þannig að flokkur 3 eru meðalnemendur (30% í miðið), flokkar 2 og 4 sýna hópa ofan og neðan meðalalags (20% í hvoru tilviki, og að síðustu sýna hópar 1 og 5 slökustu og bestu nemendur (15% í hvoru tilviki). Línurnar sýna síðan hlutföll svara við hverjum svarmöguleika, sú bláa við fyrsta svarmöguleika, sú rauða við svarmöguleika 2, sú græna við þriðja svarmöguleika og fjólubláa línan hlutfallsvara við fjórða svarmöguleika. Myndin sýnir sterk tengsl rétta svarmöguleikans, 2. svarmöguleiki, við færni í stærðfræði þrátt fyrir að einn sviga hafi vantað. Það eru meðal annars gögn af þessu tagi sem horft er á þegar ákvörðun um örlög prófatriða eru ákveðin.
23.09.2011
Frétt af undirbúningi Samræmdra prófa 23. 09. 2011
Þá er síðasti prófdagur hafinn. 4. og 7. bekkur þreyta próf stærðfræði í dag.
Yfirferðahópar í ritgerðum og starfsetningu í 4. og 7. bekk hófu störf í gær. Þeir halda áfram að vinna upp samræmi einkunnagjöf í dag, stefnt er að því að öll yfirferð komist á fulla ferð um helgina.
21.09.2011
Frétt af undirbúningi Samræmdra prófa 21. 09. 2011
Smávillur eru í dæmum 4 og 47 í stærðfræðiprófinu sem nú stendur yfir. Við biðjum ykkur að svara nemendum sem um þau spyrja að leysa þau eins eftir bestu getu. Ákvörðun um meðhöndlun þeirra, hvort allir fá rétt fyrir dæmið eða hvort ákveðin svör verða talin rétt og önnur ekki, verður tekin eftir að niðurstöður dæmanna hafa verið skoðaðar.
10. bekkur lýkur sínum samræmdu könnunarprófum í dag með prófi í stærðfræði. Jafnframt er í dag lokadagur til að leggja fyrir lesskimun í 4. bekk.
Yfirferð á ensku hófst í gær með því að hópurinn hittist á samhæfingarfundi.
Af gefnu tilefni er ástæða til að ítreka að nemendalistar séu útfylltir af samviskusemi og útskýringar settar við nemendur eftir þörfum.
20.09.2011
Frétt af undirbúningi Samræmdra prófa 20. 09. 2011
Samræmd könnunarpróf halda áfram í dag með prófi í ensku í 10. bekk. Prófgögn í íslensku af höfuðborgarsvæðinu eru kominn í hús og hefst skönnun á svarblöðum í dag.
Yfirferðahópur hittust í gær, fóru yfir matsreglur og unnu að samræmi í notkun þeirra.
Á diski með lestrarstuðningi í ensku eru lesnir upp tveir textar, Mammals og Henry winkler's story, ekki allir textarnir eins og ráslisti gefur til kynna.
19.09.2011
Frétt af undirbúningi Samræmdra prófa 19. 09. 2011
Þá er runninn upp fyrsti prófdagur samræmdra könnunarprófa 2011. Við vonum að sem flest gangi samkvæmt áætlun í dag. Við búið er að einhversstaðar komi eitthvað óvænt upp. Við erum við símann og tilbúin að leiðbeina eftir þörfum.
Við viljum minna á að vanda fárgang á prófgögnum til sendingar og færa samviskusamlega inn á mætingarlista. Við teljum öll gögn við móttöku og leitum að því sem upp á vantar ef tölur á mætingarlistum og fjöldi prófgagna stemma ekki. Þetta getur verið mjög tafsamt ef ónákvæmni er á mætingarlistum eða ef prófgögn eru ekki í stafrófsröð.
Skólar leggja núna lesskimun í 4. bekk fyrir á prófdögum 10. bekkjar. Ég minni skóla á að láta skimunarheftin fylgja prófgögnum 4. bekkjar á fimmtudaginn.
16.09.2011
Frétt af undirbúningi Samræmdra prófa 16. 09. 2011
Við viljum minna á æfingu fyrir vefritun sem er á svæði skóla. Á prófdegi mun sá hlekkur hafa breyst í slóð til að opna vefritunina (áfram verður þó til æfingasvæði fyrir nemendur í 4. og 7. bekk). Neðan við hlekkinn er slóðin sýnd þannig að hægt er að nota hana til að komast inn í vefritunina án þess að fara gegnum svæði skóla.
Endurskoðuð eintök af Leiðbeiningum lesnum í upphafi prófa voru sendar skólum í gær. Þær er einnig hægt að nálgast á svæði skóla og hér.
 Breyting hefur verið gerð á viðmóti vefritunarinnar þannig að nú er ritunin hlaðin beint inn í gagnagrunn hjá Námsmatsstofnun. Þetta gerir kleift að vista ritgerð í miðjum klíðum. Slíkan hnapp var ekki hægt að vera með þegar ritgerð var eingöngu send sem tölvupóstur. Nú verður einnig hægt að senda upptöku af frásögn nemanda í ritun inn á grunninn í gegnum hlekk við hlið vefritunar. Nauðsynlegt er að vista skrána sem MP3 form áður en hún er send (Farið í FILE, síðan SAVE AS, og farið niður í EXPOT AS MP3 eins og sýnt er á myndinni hér að neðan). Við viljum hnykkja á því að frásögn í ritun er einungis ætluð nemendum sem ekki geta skrifað af einhverjum ástæðum og hafa reynslu af munnlegri frásögn í sínu námi. Reynsla okkar er að margir þeirra nemenda sem nýta sér þetta úrræði ráða ekki við formið.
15.09.2011
Frétt af undirbúningi Samræmdra prófa 15. 09. 2011
Nú ættu prófgögn að hafa borist í alla skóla. Það er rétt að skólastjórnendur tékki á að allt hafi borist sem skyldi. Rétt er að taka fram að svarblöðum fyrir 7. bekk er pakkað með prófheftum.
Við höfum bætt hlekk inn á svæði skóla sem gerir kleift að sækja nemendalista. Nú geta skólastjórnendur því prentað nýa lista ef breytingar eru gerðar á skráningu. Þennan hlekk má sjá hér á myndinni að neðan.
14.09.2011
Frétt af undirbúningi Samræmdra prófa 14. 09. 2011
Prófgögn til skóla á höfuðborgarsvæðinu og á suðurnesjum verða send út í dag. Tíu sendibílar lögðu af stað frá okkur nú í morgunsárið og aka gögnum í hver í sitt hverfi. Skólastjórar mega því eiga von á prófgögnunum fyrir eða um hádegi.
Við viljum benda þeim skólum sem eru með nemendur í vefritun á æfingasvæði fyrir þessa nemendur. Þar geta þeir farið inn og æft sig. Smávægileg breyting er gerð á útliti vefritunarsíðunnar samhliða því að við tengjum síðuna beint við nemendagrunnin. Nú er kominn á síðuna vefhnappur sem vistar ritgerðina, eða það sem búið er að skrifa, í grunninn. Slíkt var ekki mögulegt meðan ritunin var einungis send sem tölvupóstur.
13.09.2011
Frétt af undirbúningi Samræmdra prófa 13. 09. 2011
Prófgögn fyrir skóla utan höfuðborgarsvæðis voru póstlögð seinnipartinn í gær. Í dag verður unnið við að ganga frá gögnum á höfuðborgarsvæðið og loka þeim kössum.
Lesstuðningsdiskar í ensku og stærðfræði í 10. bekk eru búnir. Því verður ekki unnt að verða við beiðnum um fleiri diska i þessum fögum.
Diskar með lestrarstuðningi kláruðust um hádegisbilið.
12.09.2011
Frétt af undirbúningi Samræmdra prófa 12. 09. 2011
Kössum með prófgögnum verður lokað í dag og stefnt er að því að senda til skóla utan höfuðborgarsvæðis í dag.
09.09.2011
Frétt af undirbúningi Samræmdra prófa 09. 09. 2011
Beðið var með að setja prófgögn í kassa og loka þeim til sendingar. Allnokkuð er um leiðréttingar og viðbætur sem verið er að bæta í sendingar. Því verða prófgögn fyrir skóla utan höfuðborgarsvæðis póstlögð á mánudagsmorgun. Hér má sjá mynd sem tekin var yfir vinnusvæði pökkunar.
Ástæða er til að minna skólafólk á að alls ekki má nota eldra prófhefti í lesskimun í 4. Bekk til að "æfa" nemendur fyrir lesskimun. Sömu prófverkefni eru notuð lesskimun frá ári til árs, með smávægilegum breytingum. Bent er á æfingaverkefni sem unnt er að nálgast hér
08.09.2011
Frétt af undirbúningi Samræmdra prófa 08. 09. 2011
Í dag er verið að pakka geisladiskum og prenta auðkenni (límmiða og forpenta). Einnig er unnið að frágangi ýmiskonar.
Nokkuð er um fyrirspurnir um ritgerðarefni í ensku. Nú verður einungis ein ritgerð, sambærileg þeirri sem nefnd hefur verið Ritgerð G undandarin ár. Nemendur skrifa um gefið efni, krafa um skipulaga uppbyggingu, gott málfar og orðaforða.
07.09.2011
Frétt af undirbúningi Samræmdra prófa 07. 09. 2011
Í gær var lokið við að pakka prófheftum í íslensku og ensku.
Í dag verður haldið áfram að prenta nöfn á svarblöð og að prenta límmiða fyrir 4. og 7. Bekk. Einnig verður í dag byrjað að pakka geisladiskum.
Í gær uppgötvaðist að kynningaglærur voru ekki aðgengilegar eins og til stóð. Þær voru settar inn á svæði skóla í gær. Þær eru ætlaðar til að auðvelda skólastjórnendum að kynna prófin og framkvæmd þeirra fyrir starfsfólki. Þær henta einnig vel til að rifja ákveðin atriði upp.
06.09.2011
Frétt af undirbúningi Samræmdra prófa 06. 09. 2011
Búið er að pakka íslensku fyrir 4. bekk og hálfnað með 7. bekk. búast má við að lokið verði við að pakka íslenskunni í dag.
Nemendalistar sem notaðir eru til að prenta á svarblöð og límmiða. Hefst sú prentun í dag.
Enn er lag á að fá sem koma inn í Leið til Læsis að panta notkun og fá skimunarheftin send með prófgögnum samræmdra prófa.
05.09.2011
Frétt af undirbúningi Samræmdra prófa 05. 09. 2011
Í dag byrjum við að pakka íslensku í 4. og 7. bekk. Enn er unnið að því að undirbúa nafnalista til að prenta límmiða og prenta á svarblöð.
02.09.2011
Frétt af undirbúningi Samræmdra prófa 02. 09. 2011
Æfingaefni fyrir lesskimun í 4. bekk er komið inn á svæði skóla. Slóð á æfingasvæði fyrir vefritun verður sett inn í dag. Þar er einnig að finna kynningaskyggnur (glærur) sem unnar eru upp úr heftinu "Framkvæmd og uppbygging samræmdra prófa 2011". Þessar glærur eru hugsaðar til þess að auðvelda stjórnendum að koma upplýsingum áfram til annarra starfsmanna skólanna. Meðal skyggnusetta er kynning á uppbyggingu prófanna sem hentar bæði fyrir kennara og nemendur, skyggnur þar sem farið er yfir fyrirlögn og það sem gerist á prófdag, hentar til að undirbúa þá sem koma að framkvæmd og yfirsetu á prófdögum, skyggnur þar sem farið er yfir stuðningsúrræði, um prófgögn og fleira og fleira.
Í dag tekur pökkunargengið til við lesskimun í 4. bekk. Við bætum áfram upplýsingum um lesstuðningshefti (gul hefti) og fjölda diska inn í skrár áður en pökkunargögn fyrir íslensku og ensku verða prentuð á mánudag.
Nafnaskrá fyrir límmiða og prentun á svarblöð verður tekin út á mánudag. Því er enn lag á að uppfæra upplýsingar, nöfn, bekkjarheiti, prófstofur eða annað.
Þeim skólum sem hyggjast nýta sér "Leið til læsis" Lesskimun og eftirfylgnipróf er bent á að panta sem fyrst til að unnt verði að senda LtL skimunarhefti með prófgögnum frá Námsmatsstofnun.
01.09.2011
Frétt af undirbúningi Samræmdra prófa 01. 09. 2011
Undirbúningur fyrir Samræmd próf er kominn á skrið. Verið er að pakka fyrir stærðfræði þessa dagana. Fjórði bekkur er kominn í pakka og eldri bekkir klárast í dag.
Við erum að stemma af fjölda á lesstuðningsheftum (gulu prófheftunum) í íslensku og ensku. Ekki eru nein gul hefti í stærðfræði í ár (notað er sama leturgerð í stærðfræði og er á lesstuðningsheftum) vegna sparnaðaraðgerða. Byrjað verður að pakka íslensku fyrir 4 bekk á morgun.
Enn er hægt að panta lesstuðningshefti fyrir íslensku og ensku. En það verður að gerast í dag.
Mætingalistar verða prentaðir eftir helgi. Því er hægt að breyta ef þörf er á.
28.06.2011
PISA 2009: Lesskilningur á Rafrænum texta
Þann 28. júní sendir OECD frá sér skýrslu um niðurstöður PISA 2009 rannsóknarinnar á frammistöðu 15 ára nemenda í lestri rafrænna texta. Um eitt þúsund íslenskir nemendur tóku þátt í þessum hluta rannsóknarinnar vorið 2009 og tóku bæði rafrænt og hefðbundið lestrarpróf. Skýrslan fjallar um frammistöðu nemenda og tengsl þeirrar færni við ýmsa aðra þætti.
Próf í rafrænum lestri er að mörgu leyti frábrugðið hefðbundnu prófi, þar sem lesandinn getur nýtt sér síbreytilegan texta, notað krækjur og glugga og er venjulega nettengdur þannig að auðvelt er að nálgast skylt efni, nokkuð sem ekki gerist við lestur hefðbundinna texta. Hið rafræna efni nýtir einnig ýmis konar margmiðlun, myndefni, samskiptasíður og fleira sem ekki finnst í hefðbundnu lesefni. Því er um nokkuð aðra hæfni að ræða en í hefðbundnu lestrarprófi. Rétt er að hafa þetta í huga þegar niðurstöður eru skoðaðar.
Íslenskir nemendur stóðu sig mjög vel í þessum hluta prófsins, og reyndist Ísland vera í fimmta sæti af þeim 19. þjóðum sem tóku þátt í þessum hluta rannsóknarinnar. Var frammistaða íslenskra nemenda í þessum prófhluta marktækt betri en í lestri hefðbundinna texta.
Nemendur í Kóreu stóðu sig allra best í þessu lestrarprófi, en íslenskir nemendur eru bestir Norðurlandabúa í prófinu. Á Íslandi og í Svíþjóð eru nemendur verulega betri í rafrænum lestri en hefðbundnum en t.d. í Danmörku og Póllandi og í fleiri löndum standa nemendur sig betur í hefðbundnum lestri.
Kynjamunur í lestri er talsvert minni í rafræna lestrinum en í hinum hefðbundna, stúlkur eru mun betri en piltar, sem samt standa sig betur en í hefðbundnum lestri.
Tölvunotkun15 ára nemenda á Íslandi er á meðal þess mesta sem rannsóknin mælir, en jafnframt kemur í ljós að sterk tengsl eru á milli tölvunotkunar heima og frammistöðu í lestri, en minni eða engin tengsl eru á milli tölvunotkunar í skólanum og lestrarframmistöðu. Þetta bendir til þess að skólar virðist ennþá eiga langt í land með að nýta sér upplýsingatæknina að fullu í starfi sínu.
Ánægja af lestri er nátengd góðum árangri í rafræna lestrarprófinu og jafnframt eru þeir nemendur sem hafa aðgang að mjög fjölbreyttu lesefni bæði hefðbundnu og rafrænu, mun betri í rafrænum lestri en þeir sem minni aðgang hafa.
Þannig sýna niðurstöðurnar að þeir sem lesa mikið af rafrænu efni lesa einnig mikið af hefðbundnu og öfugt. Jafnframt kemur í ljós að þeir nemendur sem nota netið mikið til leitar og upplýsingaöflunar hafa meiri ánægju af lestri og lesa meira en aðrir. Þeir nemendur sem nota upplýsingatæknina fyrst og fremst til þess að tengjast samskiptavefjum og hafa samskipti við aðra virðast ekki lesa meira en aðrir og standa sig lakar á lestrarprófinu. Það er því ljóst að mikil tölvunotkun ein og sér tengist ekki endilega betri lestrarfærni heldur ræðst færnin af eðli og innihaldi þess sem gert er með upplýsingatækninni. Þessu er nánar lýst í skýrslunni.
Skýrslu OECD ( Students online:Digital Technologies and Performance) má nálgast hér og á vefsvæði OECD (www.pisa.oecd.org).
Efni skýrslunnar verður nánar kynnt skólum og kennurum á haustmánuðum.
|
